Voce 'E Notte

Si 'sta voce te sceta int''a nuttata

Mentre t'astrigne 'o sposo tujo vicino

Statte scetata si vuo' sta' scetata

Ma fa' vede' ca duorme a suonno chino

Nun ghí vicino 'e llastre pe' fa' 'a spia

Pecché nun può sbaglia', 'sta voce è 'a mia

È 'a stessa voce 'e quanno tutt'e duje

Scurnuse nce parlavame cu 'o "Vvuje"

Si 'sta voce che chiagne int''a nuttata

Te sceta 'o sposo, nun ave' appaura

Dille ca è senza nomme 'a serenata

Dille ca dorme e che se rassicura

Dille accussí: "Chi canta int''a 'sta via

O sarrà pazzo o more 'e gelusia

Starrà chiagnenno quacche 'nfamità

Canta isso sulo, ma che canta a fa'?

Starrà chiagnenno quacche 'nfamità

Canta isso sulo, ma che canta a fa'?"