Lu suli è già spuntatu di lu mari
E vui bidduzza mia durmiti ancora
L'aceddi sunnu stanchi di cantari
Affriddateddi aspettanu ccà fora
Supra ssu barcuneddu su pusati
E aspettanu quann'è ca v'affacciati
Lassati stari nun durmiti cchiui
Ca 'n menzu a iddi dintra sta vanedda
Ci sugnu puru iu c'aspettu a vui
Ppi viriri sta facci accussì bedda
Passu cca fora tutti li nuttati
E aspettu sulu quannu v'affacciati
Li ciuri senza i vui nun vonnu stari
Su tutti ccu li testi a pinnuluni
Ognunu d'iddi nun voli sbucciari
Si prima nun si rapi ssu barconi
Rintra lu buttuneddu su ammucciati
E aspettanu quann'è ca v'affacciati
Passu cca fora tutti li nuttati
E aspettu sulu quannu v'affacciati
E aspettu sulu quannu v'affacciati
