La baronessa di Carini

Chiangi Palermu, chiangi Siracusa Carini c'é lu luttu ad ogni casa Cu' la purtó 'sta nova dolurusa Mai paci pozza aviri a la so' casa La megghiu stiddha ca rideva 'n celu Anima senza vesti e senza velu La megghiu stiddha di li serafini Povera barunissa di Carini Vicinu a lu casteddhu di Carini Va giriandu un bellu cavaleri Lu Vernagallu di sangu gentili Chi di la gioventú l'onuri teni Ed ora pi' lu chianu vi cumpari Supra un cavaddhu chi vola senz'ali Ora di notti cu' lu mandulinu Sentiti la so' voci a lu giardinu Voli scanzari l'amurusi affanni E a tutti 'sti premuri non rispunni Ma dintra brucia di putenti fiammi La barunissa e tutta si cunfunni Cci dici la ragiuni lassa stari! Ma 'o cori non si poti cumandari Ca la ragiuni cci ha pocu valuri Supra ogni cosa domina l'amuri Lu munnu é fattu di 'nvidiusi e 'ngratu Lu fattu cci lu cuntanu a lu patri Afferra lu baruni spata ed ermu Vola, cavaddhu, fôra di Palermu! La bella barunissa di Carini Stava affacciata 'ndi lu sò barcuni Chi arrimirava li rosi e li ciuri Cu l'occhi an'cêlu e la menti all'amuri Viju vininri 'na cavalleria Chistu é me' patri chi veni pi' mia Tuttu vestutu alla cavallerizza Chistu é me' patri chi veni e m'ammazza Signuri patri chi venistivu a fari? Signura figghia, vi vegnu a 'mmazzari E lu baruni chinu di furori Pigghia la spata e ci spacca lu cori! Lu primu corpu la beddha cadìu L'appressu corpu la beddha murìu Lu primu corpu l'appi 'ntr'a li rini L'appressu ci spaccàu coruzzu e vini! Curriti tutti laici e parrini Ora ch'é morta la vostra signura La megghiu stiddha di li serafini Povera barunissa di Carini!